mera kamre se bas nindon ka rishta tha

mirā kamre se bas nīñdoñ kā rishta thā

aur us ziine se ḳhvāboñ kā

jo lahrātā huā jaatā thā chhat tak

vo chhat

jahāñ se āsmāñ nazdīk thā

jahāñ ārām farmātī thiiñ āñkheñ

vo āñkheñ jin meñ sapne the

vo sapne jin meñ duniyā thī

vo duniyā jis meñ sab kuchh thā

vahī chhat

jahāñ par ek chiḌiyā kī surīlī chahchahāhaT thī

patangoñ kī sajāvaT thī

falak kī jhilmilāhaT thī

magar afsos

vo chiḌiyā jo savere ghar meñ sabse pahle uThtī thī

kise mā'lūm thā ik din vo zer-e-dām aa.egī

patang-e-kāġhazī jo āsmāñ chhūne hī vaalī thī

kise mā'lūm thā vo lauT kar nākām aa.egī

falak jis par tamannāoñ ke kitne chāñd raushan the

kise mā'lūm thā us par amāvas kī bhī koī shaam aa.egī

vo chhat jo ghar kā sabse pur-sukūñ aur pyārā hissa thī

kise mā'lūm thā vo ḳhud-kushī ke kaam aa.egī

mera kamre se bas nindon ka rishta tha

aur us zine se KHwabon ka

jo lahraata hua jata tha chhat tak

wo chhat

jahan se aasman nazdik tha

jahan aaram farmati thin aankhen

wo aankhen jin mein sapne the

wo sapne jin mein duniya thi

wo duniya jis mein sab kuchh tha

wahi chhat

jahan par ek chiDiya ki surili chahchahahaT thi

patangon ki sajawaT thi

falak ki jhilmilahaT thi

magar afsos

wo chiDiya jo sawere ghar mein sabse pahle uThti thi

kise ma'lum tha ek din wo zer-e-dam aaegi

patang-e-kaghazi jo aasman chhune hi wali thi

kise ma'lum tha wo lauT kar nakaam aaegi

falak jis par tamannaon ke kitne chand raushan the

kise ma'lum tha us par amawas ki bhi koi sham aaegi

wo chhat jo ghar ka sabse pur-sukun aur pyara hissa thi

kise ma'lum tha wo KHud-kushi ke kaam aaegi