inqalab

ye kah rahī hai ishāroñ meñ gardish-e-gardūñ

ki jald ham koī saḳht inqalāb dekheñge

nizām-e-charḳh meñ dekheñge ik taġhayyur-e-ḳhās

sukūn-e-dahr meñ ik iztirāb dekheñge

ḳhudā ne chāhā to ab jald hī vatan vaale

vatan meñ apnā mission kāmyāb dekheñge

duā.eñ kī haiñ jo ahl-e-vatan ne ro ro kar

yaqīñ hai jald unheñ mustajāb dekheñge

zamāna aane hī vaalā hai jab ham ai zālim

tujhe bhī ḳhvār tujhe bhī ḳharāb dekheñge

bahut hī jald tire sar pe bhī ḳhudā kī qasam

ḳhudā kā qahr ḳhudā kā itaab dekheñge

tujhe bhī dekheñge majbūr-e-fāqa-o-aflās

tujhe bhī qaid-e-ġham-o-iztirāb dekheñge

tujhe bhī apnī tarah jald hī ba-fazl-e-ḳhudā

asīr-e-silsila-e-pech-o-tab dekheñge

tujhe bhī apnī tarah pā-e-band-e-nāla-o-āh

yuuñ hī majāl-e-tbāh-o-ḳharāb dekheñge

ravāñ-davāñ tujhe hindostāñ se so.e adam

ba-qalb-e-zār o ba-chashm-e-pur-āb dekheñge

ye dekhnā hai jo kuchh ham ko us meñ der nahīñ

bahut hī jald bahut hī shitāb dekheñge

ye kah rahi hai ishaaron mein gardish-e-gardun

ki jald hum koi saKHt inqalab dekhenge

nizam-e-charKH mein dekhenge ek taghayyur-e-KHas

sukun-e-dahr mein ek iztirab dekhenge

KHuda ne chaha to ab jald hi watan wale

watan mein apna mission kaamyab dekhenge

duaen ki hain jo ahl-e-watan ne ro ro kar

yaqin hai jald unhen mustajab dekhenge

zamana aane hi wala hai jab hum ai zalim

tujhe bhi KHwar tujhe bhi KHarab dekhenge

bahut hi jald tere sar pe bhi KHuda ki qasam

KHuda ka qahr KHuda ka itab dekhenge

tujhe bhi dekhenge majbur-e-faqa-o-aflas

tujhe bhi qaid-e-gham-o-iztirab dekhenge

tujhe bhi apni tarah jald hi ba-fazl-e-KHuda

asir-e-silsila-e-pech-o-tab dekhenge

tujhe bhi apni tarah pa-e-band-e-nala-o-ah

yun hi majal-e-tbah-o-KHarab dekhenge

rawan-dawan tujhe hindostan se soe adam

ba-qalb-e-zar o ba-chashm-e-pur-ab dekhenge

ye dekhna hai jo kuchh hum ko us mein der nahin

bahut hi jald bahut hi shitab dekhenge