shayad

maiñ shāyad tum ko yaksar bhūlne vaalā huuñ

shāyad jān-e-jāñ shāyad

ki ab tum mujh ko pahle se ziyāda yaad aatī ho

hai dil ġhamgīñ bahut ġhamgīñ

ki ab tum yaad dildārāna aatī ho

shamīm-e-dūr-māñda ho

bahut ranjīda ho mujh se

magar phir bhī

mashām-e-jāñ meñ mere āshtī-mandāna aatī ho

judā.ī meñ balā kā iltifāt-e-mehramāna hai

qayāmat kī ḳhabar-gīrī hai

behad nāz-bardārī kā aalam hai

tumhāre rañg mujh meñ aur gahre hote jaate haiñ

maiñ Dartā huuñ

mire ehsās ke is ḳhvāb kā anjām kyā hogā

ye mere andarūn-e-zāt ke tārāj-gar

jazboñ ke bairī vaqt kī sāzish na ho koī

tumhāre is tarah har lamha yaad aane se

dil sahmā huā sā hai

to phir tum kam hī yaad aao

matā-e-dil matā-e-jāñ to phir tum kam hī yaad aao

bahut kuchh bah gayā hai sail-e-māh-o-sāl meñ ab tak

sabhī kuchh to na bah jaa.e

ki mere paas rah bhī kyā gayā hai

kuchh to rah jaa.e

main shayad tum ko yaksar bhulne wala hun

shayad jaan-e-jaan shayad

ki ab tum mujh ko pahle se ziyaada yaad aati ho

hai dil ghamgin bahut ghamgin

ki ab tum yaad dildarana aati ho

shamim-e-dur-manda ho

bahut ranjida ho mujh se

magar phir bhi

masham-e-jaan mein mere aashti-mandana aati ho

judai mein bala ka iltifat-e-mehramana hai

qayamat ki KHabar-giri hai

behad naz-bardari ka aalam hai

tumhaare rang mujh mein aur gahre hote jate hain

main Darta hun

mere ehsas ke is KHwab ka anjam kya hoga

ye mere andarun-e-zat ke taraj-gar

jazbon ke bairi waqt ki sazish na ho koi

tumhaare is tarah har lamha yaad aane se

dil sahma hua sa hai

to phir tum kam hi yaad aao

mata-e-dil mata-e-jaan to phir tum kam hi yaad aao

bahut kuchh bah gaya hai sail-e-mah-o-sal mein ab tak

sabhi kuchh to na bah jae

ki mere pas rah bhi kya gaya hai

kuchh to rah jae