nadaron ki eid

zardār namāzī eid ke din kapḌoñ meñ chamakte jaate haiñ

nādār musalmāñ masjid meñ jaate bhī huī sharmāte haiñ

malbūs pareshāñ dil ġhamgīñ iflās ke nashtar khāte haiñ

masjid ke farishte insāñ ko insān se kamtar paate haiñ

qur.āñ se dhuāñ sā uThtā hai īmān kā sar jhuk jaatā hai

tasbīh se uThte haiñ sho.ale sajdoñ ko pasīna aatā hai

vo vāsta jis ko fāqoñ roze roze be-bechāra kyā rakkhe

din dekh chukā shab dekh chukā qismat kā sahārā kyā rakhe

ḳhālī hoñ lahū se jis kī rageñ vo dil kā sharāra kyā rakkhe

īmān kī lazzat diiñ kā bharam iflās kā maarā kyā rakkhe

tārīk dikhā.ī detī hai duniyā ye mah-o-ḳhurshīd use

rozī kā sahārā ho jis din vo roz hai roz-e-eid use

ik mādar-e-muflis eid ke din bachchoñ ko liye bahlātī hai

sar un kā kabhī sahlātī hai narmī se kabhī samjhātī hai

qismat pe kabhī jhunjhlātī hai jiine se kabhī tañg aatī hai

zardār paḌosan ḳhush ho kar sab dekhtī hai aur khātī hai

paise kā pujārī duniyāñ meñ sach pūchho to insāñ ho na sakā

daulat kabhī īmāñ lā na sakī sarmāya musalmāñ ho na sakā

nau-ḳhez dulhan aur eid kā din kapḌoñ se numāyāñ bad-halī

kumhlā.e hue se ġhunche-tar murjhā.ī huī sī hariyālī

sūkhā huā chehra ġhurbat se utrī huī hoñToñ kī laalī

māyūs nazar TuuTā huā dil aur haath bhī paise se ḳhālī

shauhar kī nazar hasrat se bharī uThtī hai to ḳhud jhuk jaatī hai

ehsās-e-mohabbat kī duniyāñ us manzar se tharrātī hai

ḳhuuñ chuus rahā hai paudoñ kā ik phuul jo ḳhandāñ hotā hai

pāmāl banā kar sabzoñ ko ik sarv ḳharāma hotā hai

charbī mil kar insānoñ kī ik chehra daraḳhshāñ hotā hai

ye eid ke jalve bante haiñ jab ḳhūn-e-ġharībāñ hotā hai

muflis kī javānī eid ke din jab sub.h se aaheñ bhartī hai

duniyā ye amīroñ kī duniyā tab eid kī ḳhushiyāñ kartī hai

zardar namazi eid ke din kapDon mein chamakte jate hain

nadar musalman masjid mein jate bhi hui sharmate hain

malbus pareshan dil ghamgin iflas ke nashtar khate hain

masjid ke farishte insan ko insan se kamtar pate hain

quran se dhuan sa uThta hai iman ka sar jhuk jata hai

tasbih se uThte hain shoale sajdon ko pasina aata hai

wo wasta jis ko faqon roze roze be-bechaara kya rakkhe

din dekh chuka shab dekh chuka qismat ka sahaara kya rakhe

KHali hon lahu se jis ki ragen wo dil ka sharara kya rakkhe

iman ki lazzat din ka bharam iflas ka mara kya rakkhe

tarik dikhai deti hai duniya ye mah-o-KHurshid use

rozi ka sahaara ho jis din wo roz hai roz-e-eid use

ek madar-e-muflis eid ke din bachchon ko liye bahlati hai

sar un ka kabhi sahlati hai narmi se kabhi samjhati hai

qismat pe kabhi jhunjhlati hai jine se kabhi tang aati hai

zardar paDosan KHush ho kar sab dekhti hai aur khati hai

paise ka pujari duniyan mein sach puchho to insan ho na saka

daulat kabhi iman la na saki sarmaya musalman ho na saka

nau-KHez dulhan aur eid ka din kapDon se numayan bad-hali

kumhlae hue se ghunche-tar murjhai hui si hariyali

sukha hua chehra ghurbat se utri hui honTon ki lali

mayus nazar TuTa hua dil aur hath bhi paise se KHali

shauhar ki nazar hasrat se bhari uThti hai to KHud jhuk jati hai

ehsas-e-mohabbat ki duniyan us manzar se tharraati hai

KHun chus raha hai paudon ka ek phul jo KHandan hota hai

pamal bana kar sabzon ko ek sarw KHarama hota hai

charbi mil kar insanon ki ek chehra daraKHshan hota hai

ye eid ke jalwe bante hain jab KHun-e-ghariban hota hai

muflis ki jawani eid ke din jab subh se aahen bharti hai

duniya ye amiron ki duniya tab eid ki KHushiyan karti hai