zindagi ab is qadar saffak ho jaegi kya

zindagī ab is qadar saffāk ho jā.egī kyā

bhuuk hī mazdūr kī ḳhūrāk ho jā.egī kyā

mere qātil se koī ai kaash itnā pūchh le

ye zamīñ mere lahū se paak ho jā.egī kyā

har taraf uryāñ-tanī ke jashn hoñge roz o shab

is qadar tahzīb-e-nau bebāk ho jā.egī kyā

baḌh gayā saaya agar qad se to baḌhne dījiye

ḳhaak uḌ kar hamsar-e-aflāk ho jā.egī kyā

qaid-e-hastī se ba-mushkil ho sakā thā maiñ rihā

merī miTTī kāsa-gar kā chaak ho jā.egī kyā

saarī duniyā Dhal rahī hai maġhribī tahzīb meñ

be-hayā.ī ab mirī poshāk ho jā.egī kyā

vāqa.ī dariyā-e-ġham ke tez dhāroñ meñ 'razā'

zindagī merī ḳhas-o-ḳhāshāk ho jā.egī kyā

zindagi ab is qadar saffak ho jaegi kya

bhuk hi mazdur ki KHurak ho jaegi kya

mere qatil se koi ai kash itna puchh le

ye zamin mere lahu se pak ho jaegi kya

har taraf uryan-tani ke jashn honge roz o shab

is qadar tahzib-e-nau bebak ho jaegi kya

baDh gaya saya agar qad se to baDhne dijiye

KHak uD kar hamsar-e-aflak ho jaegi kya

qaid-e-hasti se ba-mushkil ho saka tha main riha

meri miTTi kasa-gar ka chaak ho jaegi kya

sari duniya Dhal rahi hai maghribi tahzib mein

be-hayai ab meri poshak ho jaegi kya

waqai dariya-e-gham ke tez dhaaron mein 'raza'

zindagi meri KHas-o-KHashak ho jaegi kya