ab teri yaad se wahshat nahin hoti mujhko

ab tirī yaad se vahshat nahīñ hotī mujh ko

zaḳhm khulte haiñ aziyyat nahīñ hotī mujh ko

ab koī aa.e chalā jaa.e maiñ ḳhush rahtā huuñ

ab kisī shaḳhs kī aadat nahīñ hotī mujh ko

aisā badlā huuñ tire shahr kā paanī pī kar

jhuuT bolūñ to nadāmat nahīñ hotī mujh ko

hai amānat meñ ḳhayānat so kisī kī ḳhātir

koī martā hai to hairat nahīñ hotī mujh ko

tū jo badle tirī tasvīr badal jaatī hai

rañg bharne meñ suhūlat nahīñ hotī mujh ko

aksar auqāt maiñ ta.abīr batā detā huuñ

ba.az auqāt ijāzat nahīñ hotī mujh ko

itnā masrūf huuñ jiine kī havas meñ 'shāhid'

saañs lene kī bhī fursat nahīñ hotī mujh ko

ab teri yaad se wahshat nahin hoti mujh ko

zaKHm khulte hain aziyyat nahin hoti mujh ko

ab koi aae chala jae main KHush rahta hun

ab kisi shaKHs ki aadat nahin hoti mujh ko

aisa badla hun tere shahr ka pani pi kar

jhuT bolun to nadamat nahin hoti mujh ko

hai amanat mein KHayanat so kisi ki KHatir

koi marta hai to hairat nahin hoti mujh ko

tu jo badle teri taswir badal jati hai

rang bharne mein suhulat nahin hoti mujh ko

aksar auqat main tabir bata deta hun

baz auqat ijazat nahin hoti mujh ko

itna masruf hun jine ki hawas mein 'shahid'

sans lene ki bhi fursat nahin hoti mujh ko