udas raaton mein tez coffee ki talKHiyon mein

udaas rātoñ meñ tez coffē kī talḳhiyoñ meñ

vo kuchh ziyāda hī yaad aatā hai sardiyoñ meñ

mujhe ijāzat nahīñ hai us ko pukārne kī

jo gūñjtā hai lahū meñ siine kī dhaḌkanoñ meñ

vo bachpanā jo udaas rāhoñ meñ kho gayā thā

maiñ DhūñDtā huuñ use tumhārī sharāratoñ meñ

use dilāse to de rahā huuñ magar ye sach hai

kahīñ koī ḳhauf baḌh rahā hai tasalliyoñ meñ

tum apnī poroñ se jaane kyā likh ga.e the jānāñ

charāġh raushan haiñ ab bhī merī hatheliyoñ meñ

jo tū nahīñ hai to ye mukammal na ho sakeñgī

tirī yahī ahmiyat hai merī kahāniyoñ meñ

mujhe yaqīñ hai vo thaam legā bharam rakhegā

ye maan hai to diye jalā.e haiñ āñdhiyoñ meñ

har ek mausam meñ raushnī sī bikherte haiñ

tumhāre ġham ke charāġh merī udāsiyoñ meñ

udas raaton mein tez coffee ki talKHiyon mein

wo kuchh ziyaada hi yaad aata hai sardiyon mein

mujhe ijazat nahin hai us ko pukarne ki

jo gunjta hai lahu mein sine ki dhaDkanon mein

wo bachpana jo udas rahon mein kho gaya tha

main DhunDta hun use tumhaari shararaton mein

use dilase to de raha hun magar ye sach hai

kahin koi KHauf baDh raha hai tasalliyon mein

tum apni poron se jaane kya likh gae the jaanan

charagh raushan hain ab bhi meri hatheliyon mein

jo tu nahin hai to ye mukammal na ho sakengi

teri yahi ahmiyat hai meri kahaniyon mein

mujhe yaqin hai wo tham lega bharam rakhega

ye man hai to diye jalae hain aandhiyon mein

har ek mausam mein raushni si bikherte hain

tumhaare gham ke charagh meri udasiyon mein