tez aandhi raat andhyari akela rah-rau

tez āñdhī raat añdhyārī akelā rāh-rau

baḌh rahā hai sochtā Dartā jhijaktā rāh-rau

manzileñ samteñ badaltī jā rahī haiñ roz o shab

is bharī duniyā meñ hai insān tanhā rāh-rau

kuchh to hai jo shahr meñ phirtā hai ghabrātā huā

be-ḳhabar varna bhare jañgal se guzrā rāh-rau

khiḌkiyāñ khulne lagīñ darvāze vā hone lage

jab bhī guzrā raah se koī sajīlā rāh-rau

ḳhizr kī sī umr varna kaise tanhā kāTte

be-sahārā rāstoñ kā haiñ sahārā rāh-rau

baḳhsh hī de koī shāyad gesuoñ kī narm chhāñv

har na.ī bastī meñ ThoḌī der Thahrā rāh-rau

koī manzil āḳhirī manzil nahīñ hotī 'fuzail'

zindagī bhī hai misāl-e-mauj-e-dariyā rāh-rau

tez aandhi raat andhyari akela rah-rau

baDh raha hai sochta Darta jhijakta rah-rau

manzilen samten badalti ja rahi hain roz o shab

is bhari duniya mein hai insan tanha rah-rau

kuchh to hai jo shahr mein phirta hai ghabraata hua

be-KHabar warna bhare jangal se guzra rah-rau

khiDkiyan khulne lagin darwaze wa hone lage

jab bhi guzra rah se koi sajila rah-rau

KHizr ki si umr warna kaise tanha kaTte

be-sahaara raston ka hain sahaara rah-rau

baKHsh hi de koi shayad gesuon ki narm chhanw

har nai basti mein ThoDi der Thahra rah-rau

koi manzil aaKHiri manzil nahin hoti 'fuzail'

zindagi bhi hai misal-e-mauj-e-dariya rah-rau