harf-e-taza nai KHushbu mein likha chahta hai

harf-e-tāza na.ī ḳhushbū meñ likhā chāhtā hai

baab ik aur mohabbat kā khulā chāhtā hai

ek lamhe kī tavajjoh nahīñ hāsil us kī

aur ye dil ki use had se sivā chāhtā hai

ik hijāb-e-tah-e-iqrār hai maane varna

gul ko mālūm hai kyā dast-e-sabā chāhtā hai

ret hī ret hai is dil meñ musāfir mere

aur ye sahrā tirā naqsh-e-kaf-e-pā chāhtā hai

yahī ḳhāmoshī ka.ī rañg meñ zāhir hogī

aur kuchh roz ki vo shoḳh khulā chāhtā hai

raat ko maan liyā dil ne muqaddar lekin

raat ke haath pe ab koī diyā chāhtā hai

tere paimāne meñ gardish nahīñ baaqī saaqī

aur tirī bazm se ab koī uThā chāhtā hai

harf-e-taza nai KHushbu mein likha chahta hai

bab ek aur mohabbat ka khula chahta hai

ek lamhe ki tawajjoh nahin hasil us ki

aur ye dil ki use had se siwa chahta hai

ek hijab-e-tah-e-iqrar hai mane warna

gul ko malum hai kya dast-e-saba chahta hai

ret hi ret hai is dil mein musafir mere

aur ye sahra tera naqsh-e-kaf-e-pa chahta hai

yahi KHamoshi kai rang mein zahir hogi

aur kuchh roz ki wo shoKH khula chahta hai

raat ko man liya dil ne muqaddar lekin

raat ke hath pe ab koi diya chahta hai

tere paimane mein gardish nahin baqi saqi

aur teri bazm se ab koi uTha chahta hai