suraj zamin ki kokh se bahar bhi aaega

sūraj zamīñ kī kokh se bāhar bhī aa.egā

huuñ muntazir ki sub.h kā manzar bhī aa.egā

miTTī kā jism le ke chale ho to soch lo

is rāste meñ ek samundar bhī aa.egā

har lahza us ke paañv kī aahaT pe kaan rakh

darvāze tak jo aayā hai andar bhī aa.egā

kab tak yūñhī zamīn se lipTe raheñ qadam

ye zo.am hai ki koī palaT kar bhī aa.egā

dekhā na thā kabhī mirī āñkhoñ ne ā.īna

ehsās bhī na thā ki mujhe Dar bhī aa.egā

patthar ke saath bāñdh ke dariyā meñ Dāliye

varna ye jism Duub ke uupar bhī aa.egā

'shāhid' bajā ye zo.am ki gauhar-shanās ho

ye soch lo ki haath meñ patthar bhī aa.egā

suraj zamin ki kokh se bahar bhi aaega

hun muntazir ki subh ka manzar bhi aaega

miTTi ka jism le ke chale ho to soch lo

is raste mein ek samundar bhi aaega

har lahza us ke panw ki aahaT pe kan rakh

darwaze tak jo aaya hai andar bhi aaega

kab tak yunhi zamin se lipTe rahen qadam

ye zoam hai ki koi palaT kar bhi aaega

dekha na tha kabhi meri aankhon ne aaina

ehsas bhi na tha ki mujhe Dar bhi aaega

patthar ke sath bandh ke dariya mein Daliye

warna ye jism Dub ke upar bhi aaega

'shahid' baja ye zoam ki gauhar-shanas ho

ye soch lo ki hath mein patthar bhi aaega