silsila raushan tajassus ka udhar mera bhi hai

silsila raushan tajassus kā udhar merā bhī hai

ai sitāro us ḳhalā meñ ik safar merā bhī hai

chaar jānib khīñch diiñ us ne lakīreñ aag kī

maiñ ki chillāyā bahut bastī meñ ghar merā bhī hai

jaane kis kā kyā chhupā hai us dhueñ kī saf ke paar

ek lamhe kā ufuq ummīd bhar merā bhī hai

raah āsāñ dekh kar sab ḳhush the phir maiñ ne kahā

soch liije ek andāz-e-nazar merā bhī hai

ab nahīñ hai us kī khiḌkī ke tanāzur meñ bhī chāñd

ek pur-asrār mausam se guzar merā bhī hai

ye bisāt-e-ārzū hai is ko yuuñ āsāñ na khel

mujh se vābasta bahut kuchh daav par merā bhī hai

jiine marne kā junūñ dil ko huā 'bānī' bahut

āsmāñ ik chāhiye mujh ko ki sar merā bhī hai

silsila raushan tajassus ka udhar mera bhi hai

ai sitaro us KHala mein ek safar mera bhi hai

chaar jaanib khinch din us ne lakiren aag ki

main ki chillaya bahut basti mein ghar mera bhi hai

jaane kis ka kya chhupa hai us dhuen ki saf ke par

ek lamhe ka ufuq ummid bhar mera bhi hai

rah aasan dekh kar sab KHush the phir main ne kaha

soch lije ek andaz-e-nazar mera bhi hai

ab nahin hai us ki khiDki ke tanazur mein bhi chand

ek pur-asrar mausam se guzar mera bhi hai

ye bisat-e-arzu hai is ko yun aasan na khel

mujh se wabasta bahut kuchh daw par mera bhi hai

jine marne ka junun dil ko hua 'bani' bahut

aasman ek chahiye mujh ko ki sar mera bhi hai