sham-e-wada ka Dhal gaya saya

shām-e-vāda kā Dhal gayā saaya

aane vaalā abhī nahīñ aayā

zindagī ke ġhamoñ ko apnā kar

ham ne dar-asl tum ko apnāyā

justujū hī diloñ kī manzil thī

ham ne kho kar tujhe, tujhe paayā

zindagī naam hai judā.ī kā

aap aa.e to mujh ko yaad aayā

ham ne terī jafā ke parde meñ

ḳhud bhī dil par bahut sitam Dhāyā

zindagī se to ḳhair shikva thā

muddatoñ maut ne bhī tarsāyā

'shād' ahhl-e-tarab ko bhī aksar

merī afsurdagī pe pyaar aayā

sham-e-wada ka Dhal gaya saya

aane wala abhi nahin aaya

zindagi ke ghamon ko apna kar

hum ne dar-asl tum ko apnaya

justuju hi dilon ki manzil thi

hum ne kho kar tujhe, tujhe paya

zindagi nam hai judai ka

aap aae to mujh ko yaad aaya

hum ne teri jafa ke parde mein

KHud bhi dil par bahut sitam Dhaya

zindagi se to KHair shikwa tha

muddaton maut ne bhi tarsaya

'shad' ahhl-e-tarab ko bhi aksar

meri afsurdagi pe pyar aaya