samundar mein utarta hun to aankhen bhig jati hain

samundar meñ utartā huuñ to āñkheñ bhiig jaatī haiñ

tirī āñkhoñ ko paḌhtā huuñ to āñkheñ bhiig jaatī haiñ

tumhārā naam likhne kī ijāzat chhin ga.ī jab se

koī bhī lafz likhtā huuñ to āñkheñ bhiig jaatī haiñ

tirī yādoñ kī ḳhushbū khiḌkiyoñ meñ raqs kartī hai

tire ġham meñ sulagtā huuñ to āñkheñ bhiig jaatī haiñ

na jaane ho gayā huuñ is qadar hassās maiñ kab se

kisī se baat kartā huuñ to āñkheñ bhiig jaatī haiñ

maiñ saarā din bahut masrūf rahtā huuñ magar jūñhī

qadam chaukhaT pe rakhtā huuñ to āñkheñ bhiig jaatī haiñ

har ik muflis ke māthe par alam kī dāstāneñ haiñ

koī chehra bhī paḌhtā huuñ to āñkheñ bhiig jaatī haiñ

baḌe logoñ ke ūñche bad-numā aur sard mahloñ ko

ġharīb āñkhoñ se taktā huuñ to āñkheñ bhiig jaatī haiñ

tire kūche se ab merā ta.alluq vājibī sā hai

magar jab bhī guzartā huuñ to āñkheñ bhiig jaatī haiñ

hazāroñ mausamoñ kī hukmarānī hai mire dil par

'vasī' maiñ jab bhī hañstā huuñ to āñkheñ bhiig jaatī haiñ

samundar mein utarta hun to aankhen bhig jati hain

teri aankhon ko paDhta hun to aankhen bhig jati hain

tumhaara nam likhne ki ijazat chhin gai jab se

koi bhi lafz likhta hun to aankhen bhig jati hain

teri yaadon ki KHushbu khiDkiyon mein raqs karti hai

tere gham mein sulagta hun to aankhen bhig jati hain

na jaane ho gaya hun is qadar hassas main kab se

kisi se baat karta hun to aankhen bhig jati hain

main sara din bahut masruf rahta hun magar junhi

qadam chaukhaT pe rakhta hun to aankhen bhig jati hain

har ek muflis ke mathe par alam ki dastanen hain

koi chehra bhi paDhta hun to aankhen bhig jati hain

baDe logon ke unche bad-numa aur sard mahlon ko

gharib aankhon se takta hun to aankhen bhig jati hain

tere kuche se ab mera talluq wajibi sa hai

magar jab bhi guzarta hun to aankhen bhig jati hain

hazaron mausamon ki hukmarani hai mere dil par

'wasi' main jab bhi hansta hun to aankhen bhig jati hain