sab log jidhar wo hain udhar dekh rahe hain

sab log jidhar vo haiñ udhar dekh rahe haiñ

ham dekhne vāloñ kī nazar dekh rahe haiñ

tevar tire ai rashk-e-qamar dekh rahe haiñ

ham shaam se āsār-e-sahar dekh rahe haiñ

merā dil-e-gum-gashta jo DhūñDā nahīñ miltā

vo apnā dahan apnī kamar dekh rahe haiñ

koī to nikal aa.egā sarbāz-e-mohabbat

dil dekh rahe haiñ vo jigar dekh rahe haiñ

hai majma-e-aġhyār ki hañgāma-e-mahshar

kyā sair mire dīda-e-tar dekh rahe haiñ

ab ai nigah-e-shauq na rah jaa.e tamannā

is vaqt udhar se vo idhar dekh rahe haiñ

har-chand ki har roz kī ranjish hai qayāmat

ham koī din us ko bhī magar dekh rahe haiñ

aamad hai kisī kī ki gayā koī idhar se

kyuuñ sab taraf-e-rāhguzar dekh rahe haiñ

takrār tajallī ne tire jalve meñ kyuuñ kī

hairat-zada sab ahl-e-nazar dekh rahe haiñ

nairañg hai ek ek tirā diid ke qābil

ham ai falak-e-shobada-gar dekh rahe haiñ

kab tak hai tumhārā suḳhan-e-talḳh gavārā

is zahr meñ kitnā hai asar dekh rahe haiñ

kuchh dekh rahe haiñ dil-e-bismil kā taḌapnā

kuchh ġhaur se qātil kā hunar dekh rahe haiñ

ab tak to jo qismat ne dikhāyā vahī dekhā

ā.inda ho kyā nafā o zarar dekh rahe haiñ

pahle to sunā karte the āshiq kī musībat

ab aañkh se vo aaTh pahar dekh rahe haiñ

kyuuñ kufr hai dīdār-e-sanam hazrat-e-vā.iz

allāh dikhātā hai bashar dekh rahe haiñ

ḳhat ġhair kā paḌhte the jo Tokā to vo bole

aḳhbār kā parcha hai ḳhabar dekh rahe haiñ

paḌh paḌh ke vo dam karte haiñ kuchh haath par apne

hañs hañs ke mire zaḳhm-e-jigar dekh rahe haiñ

maiñ 'dāġh' huuñ martā huuñ idhar dekhiye mujh ko

muñh pher ke ye aap kidhar dekh rahe haiñ

sab log jidhar wo hain udhar dekh rahe hain

hum dekhne walon ki nazar dekh rahe hain

tewar tere ai rashk-e-qamar dekh rahe hain

hum sham se aasar-e-sahar dekh rahe hain

mera dil-e-gum-gashta jo DhunDa nahin milta

wo apna dahan apni kamar dekh rahe hain

koi to nikal aaega sarbaz-e-mohabbat

dil dekh rahe hain wo jigar dekh rahe hain

hai majma-e-aghyar ki hangama-e-mahshar

kya sair mere dida-e-tar dekh rahe hain

ab ai nigah-e-shauq na rah jae tamanna

is waqt udhar se wo idhar dekh rahe hain

har-chand ki har roz ki ranjish hai qayamat

hum koi din us ko bhi magar dekh rahe hain

aamad hai kisi ki ki gaya koi idhar se

kyun sab taraf-e-rahguzar dekh rahe hain

takrar tajalli ne tere jalwe mein kyun ki

hairat-zada sab ahl-e-nazar dekh rahe hain

nairang hai ek ek tera did ke qabil

hum ai falak-e-shobada-gar dekh rahe hain

kab tak hai tumhaara suKHan-e-talKH gawara

is zahr mein kitna hai asar dekh rahe hain

kuchh dekh rahe hain dil-e-bismil ka taDapna

kuchh ghaur se qatil ka hunar dekh rahe hain

ab tak to jo qismat ne dikhaya wahi dekha

aainda ho kya nafa o zarar dekh rahe hain

pahle to suna karte the aashiq ki musibat

ab aankh se wo aaTh pahar dekh rahe hain

kyun kufr hai didar-e-sanam hazrat-e-waiz

allah dikhata hai bashar dekh rahe hain

KHat ghair ka paDhte the jo Toka to wo bole

aKHbar ka parcha hai KHabar dekh rahe hain

paDh paDh ke wo dam karte hain kuchh hath par apne

hans hans ke mere zaKHm-e-jigar dekh rahe hain

main 'dagh' hun marta hun idhar dekhiye mujh ko

munh pher ke ye aap kidhar dekh rahe hain