raushni phaili to sab ka rang kala ho gaya

raushnī phailī to sab kā rañg kaalā ho gayā

kuchh diye aise jale har-sū añdherā ho gayā

jis ne merā saath chhoḌā aur kisī kā ho gayā

sach to ye hai mujh se bhī baḌh kar vo tanhā ho gayā

vaqt kā ye moḌ kaisā hai ki tujh se mil ke bhī

tujh ko kho dene kā ġham kuchh aur gahrā ho gayā

ham ne tanhā.ī kī chādar taan lī aur so ga.e

log jab kahne lage uTTho saverā ho gayā

Dūbtā sūraj huuñ maiñ vo merā saayā dekh kar

sochtā ye hai qad us kā mujh se lambā ho gayā

chand lamhe the jo barsoñ ba.ad tak biite nahīñ

kuchh baras vo bhī the jin kā ek lamha ho gayā

jab zabāñ kholī to sab ko niiñd sī aane lagī

chup hue to yuuñ lagā har shaḳhs bahrā ho gayā

saath us kā chhoḌ kar aa.e to ye aalam rahā

ham ne jis chehre ko dekhā us kā chehra ho gayā

is ta.alluq ko bhalā 'āzād' maiñ kyā naam duuñ

vo kisī kā ho ke bhī kuchh aur merā ho gayā

raushni phaili to sab ka rang kala ho gaya

kuchh diye aise jale har-su andhera ho gaya

jis ne mera sath chhoDa aur kisi ka ho gaya

sach to ye hai mujh se bhi baDh kar wo tanha ho gaya

waqt ka ye moD kaisa hai ki tujh se mil ke bhi

tujh ko kho dene ka gham kuchh aur gahra ho gaya

hum ne tanhai ki chadar tan li aur so gae

log jab kahne lage uTTho sawera ho gaya

Dubta suraj hun main wo mera saya dekh kar

sochta ye hai qad us ka mujh se lamba ho gaya

chand lamhe the jo barson baad tak bite nahin

kuchh baras wo bhi the jin ka ek lamha ho gaya

jab zaban kholi to sab ko nind si aane lagi

chup hue to yun laga har shaKHs bahra ho gaya

sath us ka chhoD kar aae to ye aalam raha

hum ne jis chehre ko dekha us ka chehra ho gaya

is talluq ko bhala 'azad' main kya nam dun

wo kisi ka ho ke bhi kuchh aur mera ho gaya