rahon ke unch-nich zara dekh-bhaal ke

rāhoñ ke ūñch-nīch zarā dekh-bhāl ke

haañ rahrav-e-murād qadam rakh sambhāl ke

fitnoñ ko dekh apne qadam rok baiTh jā

rāteñ ye āfatoñ kī haiñ ye din vabāl ke

maiñ sargirāñ thā hijr kī rātoñ ke qarz se

māyūs ho ke lauT ga.e din visāl ke

kuchh ye na thā ki maiñ ne na samjhī bisāt-e-dahr

maiñ ḳhud hī khel haar gayā dekh-bhāl ke

sāmān-e-dil ko be-sar-o-sāmāniyāñ milīñ

kuchh aur bhī javāb the mere savāl ke

lamhoñ kī lai pe guzrī haiñ rāteñ nashāt kī

kis dhun meñ din kaTeñge ye ranj o malāl ke

taḳhlīq hai mirī tirī taḳhlīq se alag

maiñ bhī banātā rahtā huuñ paikar ḳhayāl ke

pyāsī zamīn-e-dil hai paḌā qaht-e-fasl-e-shauq

haañ ai havā kidhar ga.e din barshgāl ke

'bāqar' ye daañt biich zabāñ band kyuuñ huī

qaa.el to aap bhī the bahut qīl-o-qāl ke

rahon ke unch-nich zara dekh-bhaal ke

han rahraw-e-murad qadam rakh sambhaal ke

fitnon ko dekh apne qadam rok baiTh ja

raaten ye aafaton ki hain ye din wabaal ke

main sargiran tha hijr ki raaton ke qarz se

mayus ho ke lauT gae din visal ke

kuchh ye na tha ki main ne na samjhi bisat-e-dahr

main KHud hi khel haar gaya dekh-bhaal ke

saman-e-dil ko be-sar-o-samaniyan milin

kuchh aur bhi jawab the mere sawal ke

lamhon ki lai pe guzri hain raaten nashat ki

kis dhun mein din kaTenge ye ranj o malal ke

taKHliq hai meri teri taKHliq se alag

main bhi banata rahta hun paikar KHayal ke

pyasi zamin-e-dil hai paDa qaht-e-fasl-e-shauq

han ai hawa kidhar gae din barshgal ke

'baqar' ye dant bich zaban band kyun hui

qael to aap bhi the bahut qil-o-qal ke