phir bhig chalin aankhen chalne lagi purwai

phir bhiig chalīñ āñkheñ chalne lagī purvā.ī

har zaḳhm huā taaza har choT ubhar aa.ī

phir yaad koī aayā phir ashk umaD aa.e

phir ishq ne siine meñ ik aag sī bhaḌkā.ī

barbād-e-mohabbat kā aalam hī ajab dekhā

sau baar lahū royā sau baar hañsī aa.ī

rahtā hai ḳhayāloñ meñ phirtā hai nigāhoñ meñ

ik shāhid-e-rañgīñ kā vo ālam-e-ra.anā.ī

kis rañg se gulshan meñ vo jān-e-bahār aayā

āñchal kī havā aa.ī zulfoñ kī ghaTā chhā.ī

phir sehn-e-gulistāñ meñ ik mauj huī raqsāñ

phir merī nigāhoñ meñ zanjīr sī lahrā.ī

ai husn tire dar kī azmat hai nigāhoñ meñ

kab ishq ko aate the ādāb-e-jabīñ-sā.ī

kyā kyā dil-e-muztar ke armān machalte haiñ

tasvīr-e-qayāmat hai zālim tirī añgḌā.ī

ik rūh-e-tarannum ne ik jān-e-taġhazzul ne

phir aaj na.ī dhun meñ 'muztar' kī ġhazal gaa.ī

phir bhig chalin aankhen chalne lagi purwai

har zaKHm hua taza har choT ubhar aai

phir yaad koi aaya phir ashk umaD aae

phir ishq ne sine mein ek aag si bhaDkai

barbaad-e-mohabbat ka aalam hi ajab dekha

sau bar lahu roya sau bar hansi aai

rahta hai KHayalon mein phirta hai nigahon mein

ek shahid-e-rangin ka wo aalam-e-ranai

kis rang se gulshan mein wo jaan-e-bahaar aaya

aanchal ki hawa aai zulfon ki ghaTa chhai

phir sehn-e-gulistan mein ek mauj hui raqsan

phir meri nigahon mein zanjir si lahrai

ai husn tere dar ki azmat hai nigahon mein

kab ishq ko aate the aadab-e-jabin-sai

kya kya dil-e-muztar ke arman machalte hain

taswir-e-qayamat hai zalim teri angDai

ek ruh-e-tarannum ne ek jaan-e-taghazzul ne

phir aaj nai dhun mein 'muztar' ki ghazal gai