mujhe pata tha ki ye hadsa bhi hona tha

mujhe pata thā ki ye hādsa bhī honā thā

maiñ us se mil ke na thā ḳhush judā bhī honā thā

chalo ki jazba-e-iz.hār chīḳh meñ to Dhalā

kisī tarah ise āḳhir adā bhī honā thā

banā rahī thī ajab chitr Dūbtī huī shaam

lahū kahīñ kahīñ shāmil mirā bhī honā thā

ajab safar thā ki ham rāstoñ se kaTte ga.e

phir is ke baa'd hameñ lāpata bhī honā thā

maiñ tere paas chalā aayā le ke shikve-gile

kahāñ ḳhabar thī koī faisla bhī honā thā

ġhubār ban ke uḌe tez-rau ki un ke liye

to kyā zarūr koī rāsta bhī honā thā

sarā.e par thā dhuāñ jam' saarī bastī kā

kuchh is tarah ki koī sāniha bhī honā thā

mujhe zarā sā gumāñ bhī na thā akelā huuñ

ki dushmanoñ kā kahīñ sāmnā bhī honā thā

mujhe pata tha ki ye hadsa bhi hona tha

main us se mil ke na tha KHush juda bhi hona tha

chalo ki jazba-e-izhaar chiKH mein to Dhala

kisi tarah ise aaKHir ada bhi hona tha

bana rahi thi ajab chitr Dubti hui sham

lahu kahin kahin shamil mera bhi hona tha

ajab safar tha ki hum raston se kaTte gae

phir is ke ba'd hamein lapata bhi hona tha

main tere pas chala aaya le ke shikwe-gile

kahan KHabar thi koi faisla bhi hona tha

ghubar ban ke uDe tez-rau ki un ke liye

to kya zarur koi rasta bhi hona tha

sarae par tha dhuan jam' sari basti ka

kuchh is tarah ki koi saniha bhi hona tha

mujhe zara sa guman bhi na tha akela hun

ki dushmanon ka kahin samna bhi hona tha