masti-e-rindana hum sairabi-e-mai-KHana hum

masti-e-rindāna ham sairābi-e-mai-ḳhāna ham

gardish-e-taqdīr se haiñ gardish-e-paimāna ham

ḳhūn-e-dil se chashm-e-tar tak chashm-e-tar se tā-ba-ḳhāk

kar ga.e āḳhir gul-o-gulzār har vīrāna ham

kyā balā jabr-e-asīrī hai ki āzādī meñ bhī

dosh par apne liye phirte haiñ zindāñ-ḳhāna ham

raah meñ faujoñ ke pahre sar pe talvāroñ kī chhāñv

aa.e haiñ zindāñ meñ bhī bā-shaukat-e-shāhāna ham

miTte miTte de ga.e ham zindagī ko rang-o-nūr

rafta rafta ban ga.e is ahd kā afsāna ham

yā jagā dete haiñ zarroñ ke diloñ meñ mai-kade

yā banā lete haiñ mehr-o-māh ko paimāna ham

qaid ho kar aur bhī zindāñ meñ uḌtā hai ḳhayāl

raqs zanjīroñ meñ bhī karte haiñ āzādāna ham

masti-e-rindana hum sairabi-e-mai-KHana hum

gardish-e-taqdir se hain gardish-e-paimana hum

KHun-e-dil se chashm-e-tar tak chashm-e-tar se ta-ba-KHak

kar gae aaKHir gul-o-gulzar har virana hum

kya bala jabr-e-asiri hai ki aazadi mein bhi

dosh par apne liye phirte hain zindan-KHana hum

rah mein faujon ke pahre sar pe talwaron ki chhanw

aae hain zindan mein bhi ba-shaukat-e-shahana hum

miTte miTte de gae hum zindagi ko rang-o-nur

rafta rafta ban gae is ahd ka afsana hum

ya jaga dete hain zarron ke dilon mein mai-kade

ya bana lete hain mehr-o-mah ko paimana hum

qaid ho kar aur bhi zindan mein uDta hai KHayal

raqs zanjiron mein bhi karte hain aazadana hum