mizhgāñ ne rokā āñkhoñ meñ dam intizār se
uljhe haiñ ḳhaar dāman-e-bād-e-bahār se
matlab ḳhizāñ se hai na ġharaz hai bahār se
ham dil uThā chuke chaman-e-rozgār se
ye gul khilā na lāla-ruḳhoñ ke firāq meñ
ham daaġh le chale chaman-e-rozgār se
bismil jo haiñ to ham haiñ taḌapte jo haiñ to ham
vo ḳhush haiñ said-gāh meñ sair-e-shikār se
āġhāz-e-ishq hai vo baḌhāte haiñ rasm-o-rāh
ham dil meñ ḳhauf karte haiñ anjām-e-kār se
un ko huā jo nashsha-e-mai merī ban paḌī
parda khulā na dāman-e-mauj-e-ḳhumār se
kalkatta se bhī kījiye hāsil koī to ilm
sīkheñge sehr-e-sāmrī ham chashm-e-yār se
ai 'mehr' ye ġhazal vo pur-ejāz-o-garm hai
'ātish' agar sune nikal aa.e mazār se
mizhgan ne roka aankhon mein dam intizar se
uljhe hain KHar daman-e-baad-e-bahaar se
matlab KHizan se hai na gharaz hai bahaar se
hum dil uTha chuke chaman-e-rozgar se
ye gul khila na lala-ruKHon ke firaq mein
hum dagh le chale chaman-e-rozgar se
bismil jo hain to hum hain taDapte jo hain to hum
wo KHush hain said-gah mein sair-e-shikar se
aaghaz-e-ishq hai wo baDhate hain rasm-o-rah
hum dil mein KHauf karte hain anjam-e-kar se
un ko hua jo nashsha-e-mai meri ban paDi
parda khula na daman-e-mauj-e-KHumar se
kalkatta se bhi kijiye hasil koi to ilm
sikhenge sehr-e-samri hum chashm-e-yar se
ai 'mehr' ye ghazal wo pur-ejaz-o-garm hai
'atish' agar sune nikal aae mazar se
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
