wo chup-chap aansu bahane ki raaten

vo chup-chāp aañsū bahāne kī rāteñ

vo ik shaḳhs ke yaad aane kī rāteñ

shab-e-mah kī vo ThanDī āñcheñ vo shabnam

tire husn ke rasmasāne kī rāteñ

javānī kī doshīzgī kā tabassum

gul-e-zār ke vo khilāne kī rāteñ

phuvāreñ sī naġhmoñ kī paḌtī hoñ jaise

kuchh us lab ke sunñe-sunāne kī rāteñ

mujhe yaad hai terī har sub.h-e-ruḳhsat

mujhe yaad haiñ tere aane kī rāteñ

pur-asrār sī merī arz-e-tamannā

vo kuchh zer-e-lab muskurāne kī rāteñ

sar-e-shām se ratjagā ke vo sāmāñ

vo pichhle pahar niiñd aane kī rāteñ

sar-e-shām se tā-sahar qurb-e-jānāñ

na jaane vo thiiñ kis zamāne kī rāteñ

sar-e-mai-kada tishnagī kī vo qasmeñ

vo saaqī se bāteñ banāne kī rāteñ

ham-āġhoshiyāñ shāhid-e-mehrbāñ kī

zamāne ke ġham bhuul jaane kī rāteñ

'firāq' apnī qismat meñ shāyad nahīñ the

Thikāne ke din yā Thikāne kī rāteñ

wo chup-chap aansu bahane ki raaten

wo ek shaKHs ke yaad aane ki raaten

shab-e-mah ki wo ThanDi aanchen wo shabnam

tere husn ke rasmasane ki raaten

jawani ki doshizgi ka tabassum

gul-e-zar ke wo khilane ki raaten

phuwaren si naghmon ki paDti hon jaise

kuchh us lab ke sunne-sunane ki raaten

mujhe yaad hai teri har subh-e-ruKHsat

mujhe yaad hain tere aane ki raaten

pur-asrar si meri arz-e-tamanna

wo kuchh zer-e-lab muskurane ki raaten

sar-e-sham se ratjaga ke wo saman

wo pichhle pahar nind aane ki raaten

sar-e-sham se ta-sahar qurb-e-jaanan

na jaane wo thin kis zamane ki raaten

sar-e-mai-kada tishnagi ki wo qasmen

wo saqi se baaten banane ki raaten

ham-aghoshiyan shahid-e-mehrban ki

zamane ke gham bhul jaane ki raaten

'firaq' apni qismat mein shayad nahin the

Thikane ke din ya Thikane ki raaten