koi silsila nahin jawedan tere sath bhi tere baad bhi

koī silsila nahīñ jāvedāñ tire saath bhī tire ba.ad bhī

maiñ to har tarah se huuñ rā.egāñ tire saath bhī tire ba.ad bhī

mire ham-nafas tū charāġh thā tujhe kyā ḳhabar mire haal kī

ki jiyā maiñ kaise dhuāñ dhuāñ tire saath bhī tire ba.ad bhī

na tirā visāl visāl thā na tirī judā.ī judā.ī hai

vahī hālat-e-dil-e-bad-gumāñ tire saath bhī tire ba.ad bhī

maiñ ye chāhtā huuñ ki umr-bhar rahe tishnagī mire ishq meñ

koī justujū rahe darmiyāñ tire saath bhī tire ba.ad bhī

mire naqsh-e-pā tujhe dekh kar ye jo chal rahe haiñ unheñ batā

hai mirā surāġh mirā nishāñ tire saath bhī tire ba.ad bhī

koi silsila nahin jawedan tere sath bhi tere baad bhi

main to har tarah se hun raegan tere sath bhi tere baad bhi

mere ham-nafas tu charagh tha tujhe kya KHabar mere haal ki

ki jiya main kaise dhuan dhuan tere sath bhi tere baad bhi

na tera visal visal tha na teri judai judai hai

wahi haalat-e-dil-e-bad-guman tere sath bhi tere baad bhi

main ye chahta hun ki umr-bhar rahe tishnagi mere ishq mein

koi justuju rahe darmiyan tere sath bhi tere baad bhi

mere naqsh-e-pa tujhe dekh kar ye jo chal rahe hain unhen bata

hai mera suragh mera nishan tere sath bhi tere baad bhi