kisi but ki ada ne mar Dala

kisī but kī adā ne maar Daalā

bahāne se ḳhudā ne maar Daalā

jafā kī jaan ko sab ro rahe haiñ

mujhe un kī vafā ne maar Daalā

judā.ī meñ na aanā thā na aa.ī

mujhe zālim qazā ne maar Daalā

musībat aur lambī zindagānī

buzurgoñ kī duā ne maar Daalā

unhīñ āñkhoñ se jiinā chāhtā huuñ

jin āñkhoñ kī hayā ne maar Daalā

hamārā imtihāñ aur kū-e-dushman

kisī ne be-Thikāne maar Daalā

paḌā huuñ is tarah us dar pe 'muztar'

koī dekhe to jaane maar Daalā

kisi but ki ada ne mar Dala

bahane se KHuda ne mar Dala

jafa ki jaan ko sab ro rahe hain

mujhe un ki wafa ne mar Dala

judai mein na aana tha na aai

mujhe zalim qaza ne mar Dala

musibat aur lambi zindagani

buzurgon ki dua ne mar Dala

unhin aankhon se jina chahta hun

jin aankhon ki haya ne mar Dala

hamara imtihan aur ku-e-dushman

kisi ne be-Thikane mar Dala

paDa hun is tarah us dar pe 'muztar'

koi dekhe to jaane mar Dala