KHushbu hai kabhi gul hai kabhi shama kabhi hai

ḳhushbū hai kabhī gul hai kabhī sham.a kabhī hai

vo ātish-e-sayyāl jo siine meñ bharī hai

bāda-talbī shauq kī daryūza-garī hai

sad-shukr ki taqdīr hī yaañ tishna-labī hai

ġhunchoñ ke chaTakne kā samāñ dil meñ abhī hai

milne meñ jo uTh uTh ke nazar un kī jhukī hai

ab zabt se kah de ki ye ruḳhsat kī ghaḌī hai

ai vahshat-e-ġham der se kyā soch rahī hai

māsūm hai yaad un kī bhaTak jaa.e na rasta

ḳhūñ-gashta tamannāoñ kī kyuuñ bhiiḌ lagī hai

yādoñ se kaho solā-siñgār aaj karā.eñ

ā.īnā-ba-kaf hasrat-e-dīdār khaḌī hai

lab sī liye andesha-e-dushnām-e-jahāñ se

ab apnī ḳhamoshī hī ik afsāna banī hai

Thahrī hai to ik chehre pe Thahrī rahī barsoñ

bhaTkī hai to phir aañkh bhaTaktī hī rahī hai

KHushbu hai kabhi gul hai kabhi shama kabhi hai

wo aatish-e-sayyal jo sine mein bhari hai

baada-talbi shauq ki daryuza-gari hai

sad-shukr ki taqdir hi yan tishna-labi hai

ghunchon ke chaTakne ka saman dil mein abhi hai

milne mein jo uTh uTh ke nazar un ki jhuki hai

ab zabt se kah de ki ye ruKHsat ki ghaDi hai

ai wahshat-e-gham der se kya soch rahi hai

masum hai yaad un ki bhaTak jae na rasta

KHun-gashta tamannaon ki kyun bhiD lagi hai

yaadon se kaho sola-singar aaj karaen

aaina-ba-kaf hasrat-e-didar khaDi hai

lab si liye andesha-e-dushnam-e-jahan se

ab apni KHamoshi hi ek afsana bani hai

Thahri hai to ek chehre pe Thahri rahi barson

bhaTki hai to phir aankh bhaTakti hi rahi hai