KHud se milna milana bhul gae

ḳhud se milnā milānā bhuul ga.e

log apnā Thikānā bhuul ga.e

rañg hī se fareb khāte raheñ

ḳhushbueñ āzmānā bhuul ga.e

tere jaate hī ye huā mahsūs

aa.ine jagmagānā bhuul ga.e

jaane kis haal meñ haiñ kaise haiñ

ham jinheñ yaad aanā bhuul ga.e

paar utar to ga.e sabhī lekin

sāhiloñ par ḳhazāna bhuul ga.e

dostī bandagī vafā-o-ḳhulūs

ham ye sham.eñ jalānā bhuul ga.e

KHud se milna milana bhul gae

log apna Thikana bhul gae

rang hi se fareb khate rahen

KHushbuen aazmana bhul gae

tere jate hi ye hua mahsus

aaine jagmagana bhul gae

jaane kis haal mein hain kaise hain

hum jinhen yaad aana bhul gae

par utar to gae sabhi lekin

sahilon par KHazana bhul gae

dosti bandagi wafa-o-KHulus

hum ye shamen jalana bhul gae