kaisa tara TuTa mujh mein

kaisā taarā TuuTā mujh meñ

jhāñk rahī hai duniyā mujh meñ

koī purānā shahr hai jis kā

khultā hai darvāza mujh meñ

diyā jalā ke chhoḌ gayā hai

koī apnā saayā mujh meñ

band huī jaatī haiñ āñkheñ

kaisā manzar jaagā mujh meñ

āvāzeñ detā hai mujh ko

koī 'mīr' ke jaisā mujh meñ

koī mujh ko DhūñDhne vaalā

bhuul gayā hai rasta mujh meñ

ḳhālī thī gul-dān meñ Tahnī

khilā huā thā sho.ala mujh meñ

baras rahī thī bārish bāhar

aur vo bhiig rahā thā mujh meñ

uḌtā rahtā hai rātoñ ko

'qaisar' koī parinda mujh meñ

kaisa tara TuTa mujh mein

jhank rahi hai duniya mujh mein

koi purana shahr hai jis ka

khulta hai darwaza mujh mein

diya jala ke chhoD gaya hai

koi apna saya mujh mein

band hui jati hain aankhen

kaisa manzar jaga mujh mein

aawazen deta hai mujh ko

koi 'mir' ke jaisa mujh mein

koi mujh ko DhunDhne wala

bhul gaya hai rasta mujh mein

KHali thi gul-dan mein Tahni

khila hua tha shoala mujh mein

baras rahi thi barish bahar

aur wo bhig raha tha mujh mein

uDta rahta hai raaton ko

'qaisar' koi parinda mujh mein