ek apne silsile mein to ahl-e-yaqin hun main

ik apne silsile meñ to ahl-e-yaqīñ huuñ maiñ

chhe feet tak huuñ is ke alāva nahīñ huuñ maiñ

rū-e-zamīñ pe chaar arab mere aks haiñ

in meñ se maiñ bhī ek huuñ chāhe kahīñ huuñ maiñ

vaise to maiñ globe ko paḌhtā huuñ raat din

sach ye hai ik flat hai jis kā makīñ huuñ maiñ

Takrā ke bach gayā huuñ basoñ se ka.ī dafa

ab ke jo hādisa ho to samjho nahīñ huuñ maiñ

jaane vo koī jabr hai yā iḳhtiyār hai

daftar meñ thoḌī der jo kursī-nashīñ huuñ maiñ

merī ragoñ ke niil se ma.alūm kījiye

apnī tarah kā ek hī zahr-āfrīñ huuñ maiñ

maanā mirī nashist bhī aksar diloñ meñ hai

angina kī tarah magar dil-nashīñ huuñ maiñ

merā bhī ek baap thā achchhā sā ek baap

vo jis jagah pahuñch ke marā thā vahīñ huuñ maiñ

ek apne silsile mein to ahl-e-yaqin hun main

chhe feet tak hun is ke alawa nahin hun main

ru-e-zamin pe chaar arab mere aks hain

in mein se main bhi ek hun chahe kahin hun main

waise to main globe ko paDhta hun raat din

sach ye hai ek flat hai jis ka makin hun main

Takra ke bach gaya hun bason se kai dafa

ab ke jo hadisa ho to samjho nahin hun main

jaane wo koi jabr hai ya iKHtiyar hai

daftar mein thoDi der jo kursi-nashin hun main

meri ragon ke nil se malum kijiye

apni tarah ka ek hi zahr-afrin hun main

mana meri nashist bhi aksar dilon mein hai

angina ki tarah magar dil-nashin hun main

mera bhi ek bap tha achchha sa ek bap

wo jis jagah pahunch ke mara tha wahin hun main