hain ab to hile-bahane ke qil-o-qal ke din

haiñ ab to hīle-bahāne ke qīl-o-qāl ke din

bhulā ke rakh diye tū ne mirī majāl ke din

ki dukh ne kūcha-e-shab paar kar liyā shāyad

tulūa hone lage is liye malāl ke din

har ek lafz pashemāñ pas-e-ġhubār-e-sukūt

javāb kī vo hoñ rāteñ ki phir savāl ke din

charāġh-e-saut-o-sadā aaj kuchh munavvar hai

visāl-e-shab ke qarīñ haiñ mire ġhazāl ke din

ye intizār kī ghaḌiyāñ ye shab kā sannāTā

us ek shab meñ bhare haiñ hazār saal ke din

hain ab to hile-bahane ke qil-o-qal ke din

bhula ke rakh diye tu ne meri majal ke din

ki dukh ne kucha-e-shab par kar liya shayad

tulua hone lage is liye malal ke din

har ek lafz pasheman pas-e-ghubar-e-sukut

jawab ki wo hon raaten ki phir sawal ke din

charagh-e-saut-o-sada aaj kuchh munawwar hai

visal-e-shab ke qarin hain mere ghazal ke din

ye intizar ki ghaDiyan ye shab ka sannaTa

us ek shab mein bhare hain hazar sal ke din