girte hue jab maine tera nam liya hai

girte hue jab maiñ ne tirā naam liyā hai

manzil ne vahīñ baḌh ke mujhe thaam liyā hai

mai-ḳhvār to hai mohtasib-e-shahr ziyāda

rindoñ ne yūñhī muft meñ ilzām liyā hai

vo mil na sake yaad to hai un kī salāmat

is yaad se bhī ham ne bahut kaam liyā hai

har marhala-e-ġham meñ milī is se tasallī

har moḌ pe ghabrā ke tirā naam liyā hai

tujh sā koī rahbar nahīñ ai dūrī-e-manzil

ehsān tirā ham ne bahar-gām liyā hai

ai shaiḳh dil-e-sāf yūñhī to nahīñ miltā

ham ne asar-e-rū-e-dil-ārām liyā hai

sajdoñ meñ vo pahlī se halāvat nahīñ 'kausar'

jab se asar-e-gardish-e-ayyām liyā hai

girte hue jab main ne tera nam liya hai

manzil ne wahin baDh ke mujhe tham liya hai

mai-KHwar to hai mohtasib-e-shahr ziyaada

rindon ne yunhi muft mein ilzam liya hai

wo mil na sake yaad to hai un ki salamat

is yaad se bhi hum ne bahut kaam liya hai

har marhala-e-gham mein mili is se tasalli

har moD pe ghabra ke tera nam liya hai

tujh sa koi rahbar nahin ai duri-e-manzil

ehsan tera hum ne bahar-gam liya hai

ai shaiKH dil-e-saf yunhi to nahin milta

hum ne asar-e-ru-e-dil-aram liya hai

sajdon mein wo pahli se halawat nahin 'kausar'

jab se asar-e-gardish-e-ayyam liya hai