din mein is tarah mere dil mein samaya suraj

din meñ is tarah mire dil meñ samāyā sūraj

raat āñkhoñ ke ufuq par ubhar aayā sūraj

apnī to raat bhī jalte hī kaTī din kī tarah

raat ko so to gayā din kā satāyā sūraj

sub.h niklā kisī dulhan kī damak ruḳh pe liye

shaam Duubā kisī beva sā bujhāyā sūraj

raat ko maiñ mirā saayā the ikaTThe donoñ

le gayā chhīn ke din ko mirā saayā sūraj

din guzartā na thā kam-baḳht kā tanhā jalte

vādī-e-shab se mujhe DhūñD ke laayā sūraj

tū ne jis din se mujhe sauñp diyā zulmat ko

tab se din meñ bhī na mujh ko nazar aayā sūraj

āsmāñ ek sulagtā huā sahrā hai jahāñ

DhūñDhtā phirtā hai ḳhud apnā hī saayā sūraj

din ko jis ne hameñ nezoñ pe chaḌhā.e rakkhā

shab ko ham ne vahī palkoñ pe sulāyā sūraj

din mein is tarah mere dil mein samaya suraj

raat aankhon ke ufuq par ubhar aaya suraj

apni to raat bhi jalte hi kaTi din ki tarah

raat ko so to gaya din ka sataya suraj

subh nikla kisi dulhan ki damak ruKH pe liye

sham Duba kisi bewa sa bujhaya suraj

raat ko main mera saya the ikaTThe donon

le gaya chhin ke din ko mera saya suraj

din guzarta na tha kam-baKHt ka tanha jalte

wadi-e-shab se mujhe DhunD ke laya suraj

tu ne jis din se mujhe saunp diya zulmat ko

tab se din mein bhi na mujh ko nazar aaya suraj

aasman ek sulagta hua sahra hai jahan

DhunDhta phirta hai KHud apna hi saya suraj

din ko jis ne hamein nezon pe chaDhae rakkha

shab ko hum ne wahi palkon pe sulaya suraj