isi tarah ke shab-o-roz hain wahi duniya

isī tarah ke shab-o-roz haiñ vahī duniyā

purānī ḳhaak pe ta.amīr hai na.ī duniyā

maiñ apne aap meñ gum thā mujhe ḳhabar na huī

guzar rahī thī mujhe rauñdtī huī duniyā

har aadmī ko ye duniyā badal ke rakh degī

badal sakā na agar ab bhī aadmī duniyā

na.ī havā ko madad ke liye pukārtī hai

ḳhud apnī aag meñ jaltī huī na.ī duniyā

maiñ jis havāle se duniyā pe ġhaur kartā huuñ

usī tarah se kabhī kaash sochtī duniyā

maiñ apne asl kī jānib ravāñ davāñ huuñ aur

bulā rahī hai musalsal mujhe mirī duniyā

ajiib ḳhvāb thā jis ne mujhe ḳharāb kiyā

mirī giraft meñ aa kar nikal ga.ī duniyā

isi tarah ke shab-o-roz hain wahi duniya

purani KHak pe tamir hai nai duniya

main apne aap mein gum tha mujhe KHabar na hui

guzar rahi thi mujhe raundti hui duniya

har aadmi ko ye duniya badal ke rakh degi

badal saka na agar ab bhi aadmi duniya

nai hawa ko madad ke liye pukarti hai

KHud apni aag mein jalti hui nai duniya

main jis hawale se duniya pe ghaur karta hun

usi tarah se kabhi kash sochti duniya

main apne asl ki jaanib rawan dawan hun aur

bula rahi hai musalsal mujhe meri duniya

ajib KHwab tha jis ne mujhe KHarab kiya

meri giraft mein aa kar nikal gai duniya