dil ke nazdik to saya bhi nahin hai koi

dil ke nazdīk to saayā bhī nahīñ hai koī

is ḳharābe meñ to aayā bhī nahīñ hai koī

har surāġh apnī jagah ret meñ mādūm huā

duur tak naqsh-e-kaf-e-pā bhī nahīñ hai koī

apne sūkhe hue gul-dān kā ġham hai mujh ko

aañkh meñ ashk kā qatra bhī nahīñ hai koī

duur se ek hayūlā sā nazar aatā hai

paas se dekho to miltā bhī nahīñ koī

kitne din hote haiñ hāthoñ meñ qalam tak na liyā

kāġhazoñ meñ nazar aatā bhī nahīñ hai koī

ek hī satr likhī thī ki ye ehsās huā

lafz aur ma.anī meñ rishta bhī nahīñ hai koī

dil ke nazdik to saya bhi nahin hai koi

is KHarabe mein to aaya bhi nahin hai koi

har suragh apni jagah ret mein madum hua

dur tak naqsh-e-kaf-e-pa bhi nahin hai koi

apne sukhe hue gul-dan ka gham hai mujh ko

aankh mein ashk ka qatra bhi nahin hai koi

dur se ek hayula sa nazar aata hai

pas se dekho to milta bhi nahin koi

kitne din hote hain hathon mein qalam tak na liya

kaghazon mein nazar aata bhi nahin hai koi

ek hi satr likhi thi ki ye ehsas hua

lafz aur mani mein rishta bhi nahin hai koi