chamak jugnu ki barq-e-be-aman malum hoti hai

chamak jugnū kī barq-e-be-amāñ ma.alūm hotī hai

qafas meñ rah ke qadr-e-āshiyāñ ma.alūm hotī hai

kahānī merī rūdād-e-jahāñ ma.alūm hotī hai

jo suntā hai usī kī dāstāñ ma.alūm hotī hai

sahar tak sa.ī-e-nāla rā.egāñ ma.alūm hotī hai

ye duniyā to ba-qadr-e-yak-fuġhāñ ma.alūm hotī hai

kisī ke dil meñ gunjā.ish nahīñ vo bār-e-hastī hoñ

lahad ko bhī mirī miTTī girāñ ma.alūm hotī hai

ḳhizāñ ke vaqt bhī ḳhāmosh rahtī hai fazā saarī

chaman kī pattī pattī rāz-dāñ ma.alūm hotī hai

havā-e-shauq kī quvvat vahāñ le aa.ī hai mujh ko

jahāñ manzil bhī gard-e-kārvāñ ma.alūm hotī hai

taraqqī par hai roz-afzūñ ḳhalish dard-e-mohabbat kī

jahāñ mahsūs hotī thī vahāñ ma.alūm hotī hai

qafas kī tīliyoñ meñ jaane kyā tarkīb rakkhī hai

ki har bijlī qarīb-e-āshiyāñ ma.alūm hotī hai

na kyuuñ 'sīmāb' mujh ko qadr ho vīrāni-e-dil kī

ye buniyād-e-nashāt-e-do-jahāñ ma.alūm hotī hai

chamak jugnu ki barq-e-be-aman malum hoti hai

qafas mein rah ke qadr-e-ashiyan malum hoti hai

kahani meri rudad-e-jahan malum hoti hai

jo sunta hai usi ki dastan malum hoti hai

sahar tak sai-e-nala raegan malum hoti hai

ye duniya to ba-qadr-e-yak-fughan malum hoti hai

kisi ke dil mein gunjaish nahin wo bar-e-hasti hon

lahad ko bhi meri miTTi giran malum hoti hai

KHizan ke waqt bhi KHamosh rahti hai faza sari

chaman ki patti patti raaz-dan malum hoti hai

hawa-e-shauq ki quwwat wahan le aai hai mujh ko

jahan manzil bhi gard-e-karwan malum hoti hai

taraqqi par hai roz-afzun KHalish dard-e-mohabbat ki

jahan mahsus hoti thi wahan malum hoti hai

qafas ki tiliyon mein jaane kya tarkib rakkhi hai

ki har bijli qarib-e-ashiyan malum hoti hai

na kyun 'simab' mujh ko qadr ho virani-e-dil ki

ye buniyaad-e-nashat-e-do-jahan malum hoti hai