bas ek mah-e-junun-KHez ki ziya ke siwa

bas ek māh-e-junūñ-ḳhez kī ziyā ke sivā

nagar meñ kuchh nahīñ baaqī rahā havā ke sivā

hai ek aur bhī sūrat kahīñ mirī hī tarah

ik aur shahr bhī hai qarya-e-sadā ke sivā

ik aur samt bhī hai us se jā ke milne kī

nishān aur bhī hai ek nishān-e-pā ke sivā

zavāl-e-asr hai kuufe meñ aur gadāgar haiñ

khulā nahīñ koī dar bāb-e-iltijā ke sivā

makān-e-zar lab-e-goyā had-e-sipahr-o-zamīñ

dikhā.ī detā hai sab kuchh yahāñ ḳhudā ke sivā

mirī hī ḳhvāhisheñ baa.is haiñ mere ġham kī 'munīr'

azaab mujh pe nahīñ harf-e-mudda.ā ke sivā

bas ek mah-e-junun-KHez ki ziya ke siwa

nagar mein kuchh nahin baqi raha hawa ke siwa

hai ek aur bhi surat kahin meri hi tarah

ek aur shahr bhi hai qarya-e-sada ke siwa

ek aur samt bhi hai us se ja ke milne ki

nishan aur bhi hai ek nishan-e-pa ke siwa

zawal-e-asr hai kufe mein aur gadagar hain

khula nahin koi dar bab-e-iltija ke siwa

makan-e-zar lab-e-goya had-e-sipahr-o-zamin

dikhai deta hai sab kuchh yahan KHuda ke siwa

meri hi KHwahishen bais hain mere gham ki 'munir'

azab mujh pe nahin harf-e-muddaa ke siwa