ahl-e-dil ke waste paigham ho kar rah gai

ahl-e-dil ke vāste paiġhām ho kar rah ga.ī

zindagī majbūriyoñ kā naam ho kar rah ga.ī

ho ga.e barbād terī aarzū se pesh-tar

ziist nazr-e-gardish-e-ayyām ho kar rah ga.ī

tauba tauba us nigāh-e-mast kī sarshāriyāñ

derpā tauba bhī ġharq-e-jām ho kar rah ga.ī

us nigāh-e-nāz ko to koī kuchh kahtā nahīñ

aur mohabbat kī nazar badnām ho kar rah ga.ī

har ḳhushī tabdīl ġham meñ ho ga.ī tere baġhair

sub.h mujh tak aa.ī bhī to shaam ho kar rah ga.ī

rū-ba-rū un ke kahāñ thī fursat-e-iz.hār-e-ġham

lab ko ik jumbish barā.e naam ho kar rah ga.ī

un ke jalvoñ kī sahar to 'tarz' duniyā le ga.ī

gesuoñ kī shaam apne naam ho kar rah ga.ī

ahl-e-dil ke waste paigham ho kar rah gai

zindagi majburiyon ka nam ho kar rah gai

ho gae barbaad teri aarzu se pesh-tar

zist nazr-e-gardish-e-ayyam ho kar rah gai

tauba tauba us nigah-e-mast ki sarshaariyan

derpa tauba bhi gharq-e-jam ho kar rah gai

us nigah-e-naz ko to koi kuchh kahta nahin

aur mohabbat ki nazar badnam ho kar rah gai

har KHushi tabdil gham mein ho gai tere baghair

subh mujh tak aai bhi to sham ho kar rah gai

ru-ba-ru un ke kahan thi fursat-e-izhaar-e-gham

lab ko ek jumbish barae nam ho kar rah gai

un ke jalwon ki sahar to 'tarz' duniya le gai

gesuon ki sham apne nam ho kar rah gai