ab jo ek hasrat-e-jawani hai

ab jo ik hasrat-e-javānī hai

umr-e-rafta kī ye nishānī hai

rashk-e-yūsuf hai aah vaqt-e-azīz

'umr ik bār-e-kārvānī hai

girya har vaqt kā nahīñ be-hech

dil meñ koī ġham-e-nihānī hai

ham qafas-zād qaidī haiñ varna

tā chaman ek par-fishānī hai

us kī shamshīr tez hai hamdam

mar raheñge jo zindagānī hai

ġham-o-ranj-o-alam niko yaañ se

sab tumhārī hī mehrbānī hai

ḳhaak thī maujzan jahāñ meñ aur

ham ko dhokā ye thā ki paanī hai

yaañ hue 'mīr' tum barābar ḳhaak

vaañ vahī naaz o sargirānī hai

ab jo ek hasrat-e-jawani hai

umr-e-rafta ki ye nishani hai

rashk-e-yusuf hai aah waqt-e-aziz

'umr ek bar-e-karwani hai

girya har waqt ka nahin be-hech

dil mein koi gham-e-nihani hai

hum qafas-zad qaidi hain warna

ta chaman ek par-fishani hai

us ki shamshir tez hai hamdam

mar rahenge jo zindagani hai

gham-o-ranj-o-alam niko yan se

sab tumhaari hi mehrbani hai

KHak thi maujzan jahan mein aur

hum ko dhoka ye tha ki pani hai

yan hue 'mir' tum barabar KHak

wan wahi naz o sargirani hai