mil kar juda hue to na soya karenge hum

mil kar judā hue to na soyā kareñge ham

ik dūsre kī yaad meñ royā kareñge ham

aañsū jhalak jhalak ke satā.eñge raat bhar

motī palak palak meñ piroyā kareñge ham

jab dūriyoñ kī aag diloñ ko jalā.egī

jismoñ ko chāñdnī meñ bhigoyā kareñge ham

bin kar har ek bazm kā mauzū-e-guftugū

sheroñ meñ tere ġham ko samoyā kareñge ham

majbūriyoñ ke zahr se kar leñge ḳhud-kushī

ye buzdilī kā jurm bhī goyā kareñge ham

dil jal rahā hai zard shajar dekh dekh kar

ab chāhatoñ ke biij na boyā kareñge ham

gar de gayā daġhā hameñ tūfān bhī 'qatīl'

sāhil pe kashtiyoñ ko Duboyā kareñge ham

mil kar juda hue to na soya karenge hum

ek dusre ki yaad mein roya karenge hum

aansu jhalak jhalak ke sataenge raat bhar

moti palak palak mein piroya karenge hum

jab duriyon ki aag dilon ko jalaegi

jismon ko chandni mein bhigoya karenge hum

bin kar har ek bazm ka mauzu-e-guftugu

sheron mein tere gham ko samoya karenge hum

majburiyon ke zahr se kar lenge KHud-kushi

ye buzdili ka jurm bhi goya karenge hum

dil jal raha hai zard shajar dekh dekh kar

ab chahaton ke bij na boya karenge hum

gar de gaya dagha hamein tufan bhi 'qatil'

sahil pe kashtiyon ko Duboya karenge hum