zindagi zahr ka ek jam hui jati hai

zindagī zahr kā ik jaam huī jaatī hai

kyā se kyā ye mai-e-gulfām huī jaatī hai

kuchh gizārī hai ġham-e-ishq-o-mohabbat meñ hayāt

kuchh supurd-e-ġham-e-aiyyām huī jaatī hai

phir kisī mard-e-barāhīm kā mohtāj hai dahr

phir vahī kasrat-e-asnām huī jaatī hai

havas-e-sair-e-tamāsha hai ki hotī nahīñ ḳhatm

zindagī hai ki subuk-gām huī jaatī hai

jo kabhī ḳhāliq-e-hañgāma-e-tūfāñ thī vo mauj

haif ḳhu-karda-e-ārām huī jaatī hai

sohbat-e-pīr-e-muġhāñ meñ ye khulī azmat-e-ishq

aql bhī durd-e-tah-e-jām huī jaatī hai

tum jo aa.e ho to shakl-e-dar-o-dīvār hai aur

kitnī rañgīn mirī shaam huī jaatī hai

zindagi zahr ka ek jam hui jati hai

kya se kya ye mai-e-gulfam hui jati hai

kuchh gizari hai gham-e-ishq-o-mohabbat mein hayat

kuchh supurd-e-gham-e-aiyyam hui jati hai

phir kisi mard-e-barahim ka mohtaj hai dahr

phir wahi kasrat-e-asnam hui jati hai

hawas-e-sair-e-tamasha hai ki hoti nahin KHatm

zindagi hai ki subuk-gam hui jati hai

jo kabhi KHaliq-e-hangama-e-tufan thi wo mauj

haif KHu-karda-e-aram hui jati hai

sohbat-e-pir-e-mughan mein ye khuli azmat-e-ishq

aql bhi durd-e-tah-e-jam hui jati hai

tum jo aae ho to shakl-e-dar-o-diwar hai aur

kitni rangin meri sham hui jati hai