yahi nahin ki hamin hain yahan bikharte hue

yahī nahīñ ki hamīñ haiñ yahāñ bikharte hue

idhar to dekh rahā huuñ sabhī ko Darte hue

ye dil-fareb charāġhāñ ye qahqahoñ ke hujūm

maiñ Dar rahā huuñ ab is shahar se guzarte hue

tamām raat ham afsurdagān-e-mahfil-e-ḳhvāb

guzārte haiñ sitāroñ se baat karte hue

shafaq kā rañg bhī āñkhoñ meñ abhī baaqī hai

dikhā.ī de rahī hai raat bhī ubharte hue

ye āsmān hai behtar ki āshiyāñ merā

parind soch rahā hai uḌaan bharte hue

ye kārvān-e-badan hai safar-guzār-e-'ḳhayāl'

jaras kī guuñj pe kuchh der ko Thaharte hue

yahi nahin ki hamin hain yahan bikharte hue

idhar to dekh raha hun sabhi ko Darte hue

ye dil-fareb charaghan ye qahqahon ke hujum

main Dar raha hun ab is shahar se guzarte hue

tamam raat hum afsurdagan-e-mahfil-e-KHwab

guzarte hain sitaron se baat karte hue

shafaq ka rang bhi aankhon mein abhi baqi hai

dikhai de rahi hai raat bhi ubharte hue

ye aasman hai behtar ki aashiyan mera

parind soch raha hai uDan bharte hue

ye karwan-e-badan hai safar-guzar-e-'KHayal'

jaras ki gunj pe kuchh der ko Thaharte hue