wahan pahuncha diya hai ishq ne ab marhala dil ka

vahāñ pahuñchā diyā hai ishq ne ab marhala dil kā

jahāñ sab farq miT jaatā hai bismil aur qātil kā

judā.ī kā vafā kā jaur kā ulfat kī mushkil kā

rahā hai sāmnā har sañg se ā.īna-e-dil kā

chalo achchhā huā tum aa ga.e dam toḌtā thā maiñ

yahī dushvār thī saa.at yahī thā vaqt mushkil kā

palaT aatā huuñ maiñ māyūs ho kar un maqāmoñ se

jahāñ se silsila nazdīk-tar hotā hai manzil kā

kamāl-e-shauq meñ majnūñ anā lailā kā qaa.el hai

agar aise meñ parda ḳhud-baḳhud uTh jaa.e mahmil kā

araq se tar jabīñ ḳhanjar meñ laġhzish ruḳh pe ghabrāhaT

adab ai saḳht-jāñ parda khulā jaatā hai qātil kā

khaḌā hai 'abr' dar par kuchh nahīñ dete na do lekin

nahīñ dil toḌte arbāb-e-himmat apne saa.il kā

wahan pahuncha diya hai ishq ne ab marhala dil ka

jahan sab farq miT jata hai bismil aur qatil ka

judai ka wafa ka jaur ka ulfat ki mushkil ka

raha hai samna har sang se aaina-e-dil ka

chalo achchha hua tum aa gae dam toDta tha main

yahi dushwar thi saat yahi tha waqt mushkil ka

palaT aata hun main mayus ho kar un maqamon se

jahan se silsila nazdik-tar hota hai manzil ka

kamal-e-shauq mein majnun ana laila ka qael hai

agar aise mein parda KHud-baKHud uTh jae mahmil ka

araq se tar jabin KHanjar mein laghzish ruKH pe ghabrahaT

adab ai saKHt-jaan parda khula jata hai qatil ka

khaDa hai 'abr' dar par kuchh nahin dete na do lekin

nahin dil toDte arbab-e-himmat apne sail ka