usne kyun sab se juda meri pazirai ki

us ne kyuuñ sab se judā merī pazīrā.ī kī

maslahat-kosh thī har baat shanāsā.ī kī

zaḳhm-e-dil ham ne sajā.e to idhar bhī us ne

nāz-o-andāz se jaarī sitam-ārā.ī kī

jism tarshā huā sāñche meñ Dhalā hai jaise

dast-e-āzar ne qasam khaa.ī ho sannā.ī kī

aisā sairāb kiyā us ne ki ḳhud tishna-labī

ik sanad ban ga.ī tārīḳh meñ saqqā.ī kī

shukr hai ai shab-e-hijrāñ ki baḌī muddat par

ho ga.ī dil se mulāqāt bhī bīnā.ī kī

shukriyā tum ne bujhāyā mirī hastī kā charāġh

tum sazā-vār nahīñ tum ne to achchhā.ī kī

us ne kyun sab se juda meri pazirai ki

maslahat-kosh thi har baat shanasai ki

zaKHm-e-dil hum ne sajae to idhar bhi us ne

naz-o-andaz se jari sitam-arai ki

jism tarsha hua sanche mein Dhala hai jaise

dast-e-azar ne qasam khai ho sannai ki

aisa sairab kiya us ne ki KHud tishna-labi

ek sanad ban gai tariKH mein saqqai ki

shukr hai ai shab-e-hijran ki baDi muddat par

ho gai dil se mulaqat bhi binai ki

shukriya tum ne bujhaya meri hasti ka charagh

tum saza-war nahin tum ne to achchhai ki