ruh mein ghor andhere ko utarne na diya

ruuh meñ ghor añdhere ko utarne na diyā

ham ne insān meñ insān ko marne na diyā

tere baad aisī bhī tanhā.ī kī manzil aa.ī

ki mirā saath kisī rāhguzar ne na diyā

kaun thā kis ne yahāñ dhuup ke bādal barsā.e

aur tire husn kī chāñdī ko nikharne na diyā

pyaas kī aag lagī bhuuk kī āñdhī uTThī

ham ne phir jism kā shīrāza bikharne na diyā

zindagī kashmakash-e-vaqt meñ guzrī apnī

din ne jiine na diyā raat ne marne na diyā

ashk barsā.e kabhī ḳhuun bahāyā ham ne

ġham kā dariyā kisī mausam meñ utarne na diyā

ruh mein ghor andhere ko utarne na diya

hum ne insan mein insan ko marne na diya

tere baad aisi bhi tanhai ki manzil aai

ki mera sath kisi rahguzar ne na diya

kaun tha kis ne yahan dhup ke baadal barsae

aur tere husn ki chandi ko nikharne na diya

pyas ki aag lagi bhuk ki aandhi uTThi

hum ne phir jism ka shiraaza bikharne na diya

zindagi kashmakash-e-waqt mein guzri apni

din ne jine na diya raat ne marne na diya

ashk barsae kabhi KHun bahaya hum ne

gham ka dariya kisi mausam mein utarne na diya