panw rukte hi nahin zehn Thaharta hi nahin

paañv rukte hī nahīñ zehn Thahartā hī nahīñ

koī nashsha hai thakan kā ki utartā hī nahīñ

din guzarte haiñ guzarte hī chale jaate haiñ

ek lamha jo kisī tarah guzartā hī nahīñ

bhārī darvāza-e-āhan ki nahīñ khul paatā

mere siine meñ ye sannāTā utartā hī nahīñ

dast-e-jāñ se maiñ uThā luuñ use pī luuñ lekin

dil vo zahrāb pyāla hai ki bhartā hī nahīñ

kyā liye phirtā huuñ maiñ aab sarāb āñkhoñ meñ

Dūbtā hī nahīñ koī ki ubhartā hī nahīñ

ye pighaltī hī nahīñ sham.a ki jaltī hī nahīñ

ye bikhartā hī nahīñ dasht ki martā hī nahīñ

kuchh na kahiye to bhalā yuuñ hī samajhte rahiye

pūchh liije to vo aiboñ se mukartā hī nahīñ

panw rukte hi nahin zehn Thaharta hi nahin

koi nashsha hai thakan ka ki utarta hi nahin

din guzarte hain guzarte hi chale jate hain

ek lamha jo kisi tarah guzarta hi nahin

bhaari darwaza-e-ahan ki nahin khul pata

mere sine mein ye sannaTa utarta hi nahin

dast-e-jaan se main uTha lun use pi lun lekin

dil wo zahrab pyala hai ki bharta hi nahin

kya liye phirta hun main aab sarab aankhon mein

Dubta hi nahin koi ki ubharta hi nahin

ye pighalti hi nahin shama ki jalti hi nahin

ye bikharta hi nahin dasht ki marta hi nahin

kuchh na kahiye to bhala yun hi samajhte rahiye

puchh lije to wo aibon se mukarta hi nahin