mere wajud ko parchhaiyon ne toD diya

mire vajūd ko parchhā.iyoñ ne toḌ diyā

maiñ ik hisār thā tanhā.iyoñ ne toḌ diyā

baham jo mahfil-e-aġhyār meñ rahe the kabhī

ye silsila bhī shanāsā.iyoñ ne toḌ diyā

bas ek rabt nishānī thā apne purkhoñ kī

ise bhī aaj mire bhā.iyoñ ne toḌ diyā

tū be-ḳhabar hai magar niind se bharī laḌkī

mirā badan tirī añgḌā.iyoñ ne toḌ diyā

ḳhizāñ kī rut meñ bhī maiñ shāḳh se nahīñ TuuTā

mujhe bahār kī purvā.iyoñ ne toḌ diyā

mirā bharam thā yahī ek merī tanhā.ī

ye ik bharam bhī tamāshā.iyoñ ne toḌ diyā

mere wajud ko parchhaiyon ne toD diya

main ek hisar tha tanhaiyon ne toD diya

baham jo mahfil-e-aghyar mein rahe the kabhi

ye silsila bhi shanasaiyon ne toD diya

bas ek rabt nishani tha apne purkhon ki

ise bhi aaj mere bhaiyon ne toD diya

tu be-KHabar hai magar nind se bhari laDki

mera badan teri angDaiyon ne toD diya

KHizan ki rut mein bhi main shaKH se nahin TuTa

mujhe bahaar ki purwaiyon ne toD diya

mera bharam tha yahi ek meri tanhai

ye ek bharam bhi tamashaiyon ne toD diya