kamal ye hai ki duniya ko kuchh pata na lage

kamāl ye hai ki duniyā ko kuchh pata na lage

ho iltijā bhī kuchh aisī ki iltijā na lage

purānī bāteñ haiñ ab un kā zikr bhī chhoḌo

agar kisī ko sunā.ūñ to ik fasāna lage

vo ek lamha thā jis ne kiyā mujhe bismil

maiñ dāstān batā.ūñ to ik zamāna lage

base haiñ jalve kuchh aise nigāh-e-āshiq meñ

jise bhī dekhe koī tujh se mā-sivā na lage

na jaane kaun sī manzil pe ishq aa pahuñchā

duā bhī kaam na aa.e koī davā na lage

fareb rah ke bhī mahrūmiyāñ muqaddar thiiñ

nazar uThā.ūñ to us ko kahīñ burā na lage

ye kā.enāt kī sachchā.ī ab kahāñ DhūñDūñ

suhānī raat kā manzar ho aur suhānā lage

maiñ duur baiThā thā sahrā meñ ik umiid liye

ise batā.ūñ to ye sach bhī ik bahāna lage

banā liyā hai ik ā.īna apne dil ko 'shahīd'

mujhe to shahr meñ ab koī bevafā na lage

kamal ye hai ki duniya ko kuchh pata na lage

ho iltija bhi kuchh aisi ki iltija na lage

purani baaten hain ab un ka zikr bhi chhoDo

agar kisi ko sunaun to ek fasana lage

wo ek lamha tha jis ne kiya mujhe bismil

main dastan bataun to ek zamana lage

base hain jalwe kuchh aise nigah-e-ashiq mein

jise bhi dekhe koi tujh se ma-siwa na lage

na jaane kaun si manzil pe ishq aa pahuncha

dua bhi kaam na aae koi dawa na lage

fareb rah ke bhi mahrumiyan muqaddar thin

nazar uThaun to us ko kahin bura na lage

ye kaenat ki sachchai ab kahan DhunDun

suhani raat ka manzar ho aur suhana lage

main dur baiTha tha sahra mein ek umid liye

ise bataun to ye sach bhi ek bahana lage

bana liya hai ek aaina apne dil ko 'shahid'

mujhe to shahr mein ab koi bewafa na lage