kahun ye kaise ki jine ka hausla dete

kahūñ ye kaise ki jiine kā hausla dete

magar yahī ki mujhe ġham koī nayā dete

shab-e-guzishta bahut tez chal rahī thī havā

sadā to dī pe kahāñ tak tujhe sadā dete

ka.ī zamāne isī pech-o-tāb meñ guzre

ki āsmāñ ko tire paañv par jhukā dete

ye kahiye lauh-e-jabīñ par hai dāġh-e-rusvā.ī

zamāne vaale hameñ ḳhaak meñ milā dete

huī thī ham se jo laġhzish to thaam lenā thā

hamāre haath tumheñ umr bhar duā dete

bhalā huā ki koī aur mil gayā tum sā

vagarna ham bhī kisī din tumheñ bhulā dete

koī ho lamha-e-fursat ki baiTh kar ham bhī

zarā urūs-e-tamannā ko ā.īna dete

milā hai jurm-e-vafā par azāb-e-mahjūrī

ham apne aap ko is se kaḌī sazā dete

zabāñ pe kis liye ye harf-e-nāgavār aatā

hamāre zaḳhm hamārā agar patā dete

zarā sī der Thahartī jo gardish-e-ayyām

use shabāb-e-gurezāñ kā vāsta dete

kahun ye kaise ki jine ka hausla dete

magar yahi ki mujhe gham koi naya dete

shab-e-guzishta bahut tez chal rahi thi hawa

sada to di pe kahan tak tujhe sada dete

kai zamane isi pech-o-tab mein guzre

ki aasman ko tere panw par jhuka dete

ye kahiye lauh-e-jabin par hai dagh-e-ruswai

zamane wale hamein KHak mein mila dete

hui thi hum se jo laghzish to tham lena tha

hamare hath tumhein umr bhar dua dete

bhala hua ki koi aur mil gaya tum sa

wagarna hum bhi kisi din tumhein bhula dete

koi ho lamha-e-fursat ki baiTh kar hum bhi

zara urus-e-tamanna ko aaina dete

mila hai jurm-e-wafa par azab-e-mahjuri

hum apne aap ko is se kaDi saza dete

zaban pe kis liye ye harf-e-nagawar aata

hamare zaKHm hamara agar pata dete

zara si der Thaharti jo gardish-e-ayyam

use shabab-e-gurezan ka wasta dete