jaanib-e-kucha-o-bazar na dekha jae

jānib-e-kūcha-o-bāzār na dekhā jaa.e

ġhaur se shahr kā kirdār na dekhā jaa.e

khiḌkiyāñ band kareñ chhup ke gharoñ meñ baiTheñ

kyā samāñ hai pas-e-dīvār na dekhā jaa.e

surḳhiyāñ ḳhuun meñ Duubī haiñ sab aḳhbāroñ kī

aaj ke din koī aḳhbār na dekhā jaa.e

shahr kā shahr gunahgār to ho saktā hai

jab kahīñ koī gunahgār na dekhā jaa.e

dasht se kam nahīñ vīrāñ koī bastī 'maḳhmūr'

ye hujūm-e-dar-o-dīvār na dekhā jaa.e

jaanib-e-kucha-o-bazar na dekha jae

ghaur se shahr ka kirdar na dekha jae

khiDkiyan band karen chhup ke gharon mein baiThen

kya saman hai pas-e-diwar na dekha jae

surKHiyan KHun mein Dubi hain sab aKHbaron ki

aaj ke din koi aKHbar na dekha jae

shahr ka shahr gunahgar to ho sakta hai

jab kahin koi gunahgar na dekha jae

dasht se kam nahin viran koi basti 'maKHmur'

ye hujum-e-dar-o-diwar na dekha jae