idhar bhi dekh zara be-qarar hum bhi hain

idhar bhī dekh zarā be-qarār ham bhī haiñ

tire fidā.ī tire jāñ-nisār ham bhī haiñ

buto haqīr na samjho hameñ ḳhudā ke liye

ġharīb banda-e-parvar-digār ham bhī haiñ

kahāñ kī tauba ye mauqā hai phuul uḌāne kā

chaman hai abr hai saaqī hai yaar ham bhī haiñ

misāl-e-ġhuncha udhar ḳhanda-zan hai vo gul-e-tar

misāl-e-abr idhar ashk-bār ham bhī haiñ

jigar ne dil se kahā dard-e-hijr-e-jānāñ meñ

ki ek tū hī nahīñ be-qarār ham bhī haiñ

mudām sāmne ġhairoñ ke be-naqāb rahe

isī pe kahte ho tum parda-dār ham bhī haiñ

hameñ bhī dījiye apnī galī meñ thoḌī jagah

ġharīb balki ġharīb-ud-dayār ham bhī haiñ

shagufta bāġh-e-suḳhan hai hamīñ se ai 'sābir'

jahāñ meñ misl-e-nasīm-e-bahār ham bhī haiñ

idhar bhi dekh zara be-qarar hum bhi hain

tere fidai tere jaan-nisar hum bhi hain

buto haqir na samjho hamein KHuda ke liye

gharib banda-e-parwar-digar hum bhi hain

kahan ki tauba ye mauqa hai phul uDane ka

chaman hai abr hai saqi hai yar hum bhi hain

misal-e-ghuncha udhar KHanda-zan hai wo gul-e-tar

misal-e-abr idhar ashk-bar hum bhi hain

jigar ne dil se kaha dard-e-hijr-e-jaanan mein

ki ek tu hi nahin be-qarar hum bhi hain

mudam samne ghairon ke be-naqab rahe

isi pe kahte ho tum parda-dar hum bhi hain

hamein bhi dijiye apni gali mein thoDi jagah

gharib balki gharib-ud-dayar hum bhi hain

shagufta bagh-e-suKHan hai hamin se ai 'sabir'

jahan mein misl-e-nasim-e-bahaar hum bhi hain