husn jab maqtal ki jaanib tegh-e-burran le chala

husn jab maqtal kī jānib teġh-e-burrāñ le chalā

ishq apne mujrmoñ ko pā-ba-jaulāñ le chalā

ārzū-e-dīd-e-jānāñ bazm meñ laa.ī mujhe

bazm se maiñ ārzū-e-dīd-e-jānāñ le chalā

bismiloñ ko zaḳhm zaḳhmoñ ko mubārak lazzateñ

sū-e-maqtal phir koī teġh-o-namak-dāñ le chalā

ḳhūn-e-nāhaq kī hayā bolī zarā muñh Dhāñk lo

naaz jab un ko sar-e-ḳhāk-e-shahīdāñ le chalā

kaT gayā āshiq sar-e-bāzār saudā bik gayā

jān-e-lailā ishq ne dil husn-e-ḳhūbāñ le chalā

ḳhāk-e-āshiq rokne ko duur tak lipTī ga.ī

jab samand-e-nāz ko vo garm-jaulāñ le chalā

mere ghar tak paañv paḌ kar un ko laayā thā niyāz

naaz dāman khīñchtā sū-e-raqībāñ le chalā

dil ko jānāñ se 'hasan' samjhā-bujhā ke laa.e the

dil hameñ samjhā-bujhā kar sū-e-jānāñ le chalā

husn jab maqtal ki jaanib tegh-e-burran le chala

ishq apne mujrmon ko pa-ba-jaulan le chala

aarzu-e-did-e-jaanan bazm mein lai mujhe

bazm se main aarzu-e-did-e-jaanan le chala

bismilon ko zaKHm zaKHmon ko mubarak lazzaten

su-e-maqtal phir koi tegh-o-namak-dan le chala

KHun-e-nahaq ki haya boli zara munh Dhank lo

naz jab un ko sar-e-KHak-e-shahidan le chala

kaT gaya aashiq sar-e-bazar sauda bik gaya

jaan-e-laila ishq ne dil husn-e-KHuban le chala

KHak-e-ashiq rokne ko dur tak lipTi gai

jab samand-e-naz ko wo garm-jaulan le chala

mere ghar tak panw paD kar un ko laya tha niyaz

naz daman khinchta su-e-raqiban le chala

dil ko jaanan se 'hasan' samjha-bujha ke lae the

dil hamein samjha-bujha kar su-e-jaanan le chala