gham ke hathon mere dil par jo saman guzra hai

ġham ke hāthoñ mire dil par jo samāñ guzrā hai

hādisa aisā zamāne meñ kahāñ guzrā hai

zindagī kā hai ḳhulāsa vahī ik lamha-e-shauq

jo tirī yaad meñ ai jān-e-jahāñ guzrā hai

hāl-e-dil ġham se ye hai jaise kisī sahrā meñ

abhī ik qāfila-e-nauha-garāñ guzrā hai

bazm-e-doshīñ ko karo yaad ki is kā har rind

raunaq-e-bār-gah-e-pīr-e-muġhāñ guzrā hai

pā-ba-gul jo the vo āzurda nazar aate haiñ

shāyad is raah se vo sarv-e-ravāñ guzrā hai

nigrānī-e-dil-o-dīda huī hai dushvār

koī jab se mirī jānib nigarāñ guzrā hai

hāl-e-dil sun ke vo āzurda haiñ shāyad un ko

is hikāyat pe shikāyat kā gumāñ guzrā hai

vo gul-afshānī-e-guftār kā paikar 'sālik'

aaj kūche se tire ashk-fishāñ guzrā hai

gham ke hathon mere dil par jo saman guzra hai

hadisa aisa zamane mein kahan guzra hai

zindagi ka hai KHulasa wahi ek lamha-e-shauq

jo teri yaad mein ai jaan-e-jahan guzra hai

haal-e-dil gham se ye hai jaise kisi sahra mein

abhi ek qafila-e-nauha-garan guzra hai

bazm-e-doshin ko karo yaad ki is ka har rind

raunaq-e-bar-gah-e-pir-e-mughan guzra hai

pa-ba-gul jo the wo aazurda nazar aate hain

shayad is rah se wo sarw-e-rawan guzra hai

nigrani-e-dil-o-dida hui hai dushwar

koi jab se meri jaanib nigaran guzra hai

haal-e-dil sun ke wo aazurda hain shayad un ko

is hikayat pe shikayat ka guman guzra hai

wo gul-afshani-e-guftar ka paikar 'salik'

aaj kuche se tere ashk-fishan guzra hai